Amis

Ij nòst dëscors a son lontan
ij di a son passà coma 'I vent
travers na tèila d'aragn
i j'ero masnà mach jer
gnanca adess i soma òmo
ësmijoma 'd projession
àn sël linseul dël temp.
It n'arcòrde Pierin?
Ij nòst ideaj ij seugn le veuje
'd core për ël mond a serché fortun-a
dëscàuss patanù sensa paure,
e Majo it lo arcòrde?
a j'era sempre 'I pì elegant
scarpe lustre crovatin brilantìn-a
e sempe na pivela 'nsema
e soa mare, la portiera dël trantesset
a scala ses, it Parcòrde?
e Carlìn ël barbé tifos dël Tòr
ch'a rusava con Stevo ch'a tenìa për la Juve
mi e tì malavi 'd mòto
ch'i tiravo a 'ndviné dal romor che mòto a j'era
còsa a faran adess?
a l'avran fàit fortun-a
a s'arcorderan ancora 'd noi?
a l'é nen sèj d'arcòrd
mach la veuja 'd savèj
coma a l'é 'ndàita
se ij seugn a son dventà realtà
ò ansema al vent dël temp
travers a cola tèila d'aragn
i soma stàit ciapà 'dcò noi
coma le mosche
e l'aragn ëd la delusion
a l'abia ciuciane tut
lassandne mach la greuja
e gnun arcòrd
ò ansima al linseul dël cinéma dël temp
a-i sarà scrita la paròla fin?
ma nen për noi:
j'amis, ij seugn a meuiro mai.