Linseul dë sposa

I son ëvnù a serchete sai nen përchè
i j'era curios ëd savèj s'a l'era capitate
chèich brut maleur, ò se it j'ere tornà a tò pais.
Mi 'd gent na vëddo passé tanta
darera a mè sportel dël Mont,
da «Paolin» coma a diso sì a Turin;
vëddo 'd bel, ëd brut, ël ' da bzògn
la superbia, 'I maleur
a passo an tanti angagé j'arcòrd:
quat sòld për continué a vive.
Ma 'd ti, Ginòta Pautass mi i savìa tut:
andova it j'ere nàita, andova të stasìe 'd ca
la grama sòrt ch'a l'avìa fate lassé toa tèra
e ij tò mòrt, soj sensa na fior, sensa 'd ti.
Tò òm Cichin, Giaco 'I fieul pì vej
mòrt an tèra d'Àfrica, e Gino
l'ùltim, massà dai plùfer
quand ch'a j'era ancora masnà.
con ël làit an sij làver.
It l'hass contame toa vita
minca 'n tòch che it portave
a j'era 'n tòch ëd ti:
la mostra 'd cé
j'orcin e l'anel da morosa
e col da sposa.
La vita a l'é dura,
fasso coma i peudo
për tiré anans.
Ël magon pì gròss
it l'hass fam-lo vnì l'ùltima vòlta
quand ch'it l'has portame doi linseuj
it l'hass vardame mal përchè it dasìa pòch
për ti a valìo tant, e prima d'andet-ne
it l'hass vardame con j'euj pien ëd magon
e con vos bassa squasi it n'ancalèisse nen
it l'hass dime:
- M'arcomando, ch'a-j ten-a bin
a son le cose pì bele 'd mia dòta.
A l'é për sòn ch'i son vnù a serchete
për dite che ij tò linseuj a torno a ca;
ma 'I sotror a l'é rivà prima 'd mi
a l'ha portate via jer sensa na fior
figura anònima ant un mond veuid e gram
coma col ch'a passa tuti ij di
darera mè sportel dël Mont:
da «Paolin» coma a diso sì a Turin.