Eroin-a

It l'has vardame con j'euj sbefios
i son girame a l'andarera
për vëdde se it vardave mi ò n'àutr,
anvece nò it im vardave insistent
con ël soris an sij làver
i l'hai ciamate përché
ghignand it l'has dime:
fate furb, it vude nen ch'it ses mòrt
fate furb barachin.
A son mancame le paròle
drinta 'd mi rabia e dolor
e quand ch'it ses calà dal tram
a la prima fermada
i son stàit coma fulminà
i son vardame le man,
rudie 'd quaj nen polide
la borsa dël travaj
le scarpe veje
i son sentume strach,
coma mòrt.
Përchè it l'has sbefiame, giovo,
përchè i son nen bin vestì
n'òmo d'àutri temp, nen a la mòda?
It l'has rason, vivo parèj
ma drinta 'd mì ij seugn për doman
anche se vivo 'd pan
i son ëstàit bon a lassé
un cit pertus ant ël mè cel
për l'esistensa, për vude 'I sol.
E ti coma it vive
ant ël temp ëd j'eròi
sbefios, fòrt sensa ideaj
seugn fàuss fàit d'eroin-a?
Bin, lassa ch'it disa
'n pensé gram:
'eroin-a a fà nen j'eròi
a fà 'd mòrt sota 'n cel gris
sensa doman, sensa sol,
pensie 'n moment
ma chi a l'é lë sbefià;
ti, o mi?