Tèra rossa dë Spagna

Tèra rossa dë Spagna
sol bujent
silensi rot dal crijé ëd siale cioche
Goya a nassìa
Tèra rossa dë Spagna
disegn nèir ëd guère grame
Goya a contava
Tèra rossa dë Spagna
ore mute
sarà 'n mes a muraje bianche
Goya a sperava
Tèra rossa dë Spagna
feste amor canson
bataje 'd tòr, ghitare
Goya a vivìa
Tèra rossa dë Spagna
sensitiva anciarmanta
con mila color, romor ëd vita
Goya a sognava
Tèra rossa dë Spagna
consèrt ëd siale cioche
ant un mesdì fermà 'nt ël temp
Goya a muirìa